சித்திரம் பேசுதடி

Monday, September 19, 2011

புதிய பறவை எனது நெஞ்சில்.....

எங்க வீட்டு தோட்டத்து தென்னை மரத்துக்கு இன்றைய புதிய வரவு.. சமத்தா அஞ்சு நிமிஷம் போஸ் கொடுத்தார்.

From new visitor

பின்புலத்திலே இவ்வளோ வெளிச்சத்தோட பறவையை போகஸ் பண்ணி படம் எடுக்க முன்னே ரொம்ப கஷ்டப்பட்டேன். அப்புறம் ஜீவ்ஸ் சொல்லிக்கொடுத்த உத்தியை பயன்படுத்தினேன். கடைசி படங்கள் இன்னும் ஒரு முன்னேற்றம். பறவையை போகஸ் பண்ணாம கீழே இருக்கிற தென்னை மட்டையை போகஸ் பண்ணேன். பறவையும் தானா நல்லா வந்துடுத்து! ஜீவ்ஸுக்கு நன்றி!

Friday, August 5, 2011

மீண்டும் வானவில்!

இன்னைக்கும் மழையும் வெய்யிலும் அடிக்க முன்னேற்பாடா காமிராவோட மாடிக்கு போனேன். போன தரம் திவாலான வானவில்லா இல்லாம ரொம்ப நேரம் இருந்தது.

From vanavil-2

கொஞ்ச நேரத்தில பெரிசாவே தெரிஞ்சது!

From vanavil-2

காத்து இருந்தது வீணாகாம இரண்டாவது வானவில்லும் வந்தாச்சு!

From vanavil-2

இன்னும் கொஞ்ச நேரத்துல அது நல்லாவே அழுத்தமா ஆச்சு!

From vanavil-2

கடைசியா இதை பநோரமாவா எடுத்த படம. இது இன்னும் பெரிசா வரணும். என்ன பிரச்சினைன்னு பாத்து அப்புறம் சரி செய்யறேன்.

From vanavil-2

எல்லா படங்களையும் பிகாசாவில பாருங்க!

vanavil-2

Sunday, July 31, 2011

திவானவில்...

மூன்று நாட்கள் முன் மாலை கணினியில் வேலை செய்யும் போது வெளியே மழை பெய்வது போல இருந்தது. அட வெயிலுடன் மழை! இது திவ்ய ஸ்நானம் என்று வெளியே ஒடி நனைந்தேன். இதற்குள் என் மருமகள் மாடியில் இருந்து கூப்பிடுவது கேட்டது. பார்த்தால் இரட்டை வானவில்! கரிய மேகங்கள் பின்னணியில்! அற்புதமான காட்சி.

கீழே ஓடிப்போய் காமிராவை கொண்டு வரும் முன் இரண்டாவது வானவில்லை காணவில்லை! பார்த்துக்கொண்டு இருக்கும் போதே இடது பக்கத்தில் இருந்து கொஞ்சம் கொஞ்சமாக மறைந்து போயிற்று! மொத்த காட்சியே இரண்டு நிமிஷங்களுக்கும் குறைவு!

From rainbow

௩,௪, ௫ படங்களிலே என்ன கருப்பு புள்ளி? ஹிஹிஹி மழைத்துளி!

Saturday, July 16, 2011

கா கா காக்கா!

கடும் கோடையாச்சேன்னு மொட்டை மாடில பறவைகளுக்காக தண்ணீர் ஏற்பட்டு செய்தேன். பெரிசா ஒண்ணுமில்ல. நீர்த்தொட்டி நிரம்பி வழியறப்ப தண்ணி சேருகிறா மாதிரி ஒரு டிரம் வெச்சேன். காகங்கள் மற்ற பறவைகள் எல்லாம் தண்ணி குடித்து போறதை பாத்து சந்தோஷம்.

From crow

காக்கா இதுக்கு கைமாறா துணி உலர்த்துகிற இடத்து பக்கத்தில பைப் மேலே உட்கார்ந்து வேட்டி, புடவை, கைப்பிடி சுவர் எல்லாத்து மேலேயும் எச்சமிட்டு அசிங்கப்படுத்தி கொண்டிருந்தது.

என்ன செய்யறதுன்னு புரியலை. போன ரெண்டு மாசமா இந்த பிரச்சினை ரொம்ப அதிகமாயிடுத்து.

From crow

சில சமயம் நேரடியா எச்சமிடாம போனாலும் துணி காத்துல நகர்ந்து போய் கைப்பிடி சுவத்தில இருக்கிற எச்சத்து மேலே பட்டு துணி வீணாகும்.

From crow

திடீர்ன்னு பல வருஷங்கள் முன்னால ஆர்தர் ஹெய்லியோட ஹைய் ப்லேசெஸ் புத்தகம் படிச்ச நினைவு வந்தது. அதில ஒரு ஆசாமி அலுவலக கூரை மேலே புறாக்கள் எச்சமிடுவதை தடுக்க என்ன செஞ்ச்சார்ந்னு படிச்சது நினைவுக்கு வந்தது. ரெண்டு மூணு பேர்கிட்ட சொல்லி சொல்லி நேத்து கடைசி அல்டிமேட்டம்ன்னு சொல்லி ஒரு வழியா கம்பி வாங்கி வந்து கட்டிட்டாங்க.

From crow

மேலே இருக்கிற படத்துல கீழ் கம்பி தெரியலை. கீழ் படத்தை பாருங்க. பைப்புக்கு இணையா கம்பி கட்டியாச்சு. இப்ப காக்கா அங்கே உக்கார முடியாது. பிரச்சினை தீருமா இல்லை காக்கா வேற வழி கண்டுபிடிக்குமான்னு பொறுத்துதான் பார்க்கணும். நாராயணா காப்பாத்து!

From crow

Tuesday, May 31, 2011

ஓலைச்சுவடி - மின்னாக்கம் - 2

மேலே படங்களை தேவையான படிக்கு மாற்றிக்கொள்ள செய்யவேண்டியன என்ன என்று பார்க்கலாம்.

நாம் எடுத்த படங்களில் ஒரு படத்துக்கு எட்டு ஓலைகள் வீதம் படம் எடுத்தோம். இவற்றை பிரிக்க வேண்டுமில்லையா?

இதற்கு நாம் பயன்படுத்த வேண்டிய மென்பொருள் கிம்ப்.

இந்த இலவச மென்பொருளை இங்கிருந்து தரவிறக்கிக்கொள்ளலாம்..

கணினியில் விண்டோஸ் எக்ஸ்ப்ளோரர் ஐ துவக்கி இந்த படங்கள் இருக்கும் அடைவை திறக்கவும். அதில் இரண்டு புதிய அடைவுகள் உருவாக்கவும். ஓன்று A, மற்றது Bஎன பெயரிடவும். இது எதற்கு என்று பின்னால் தெரியவரும்.

காமிராவில் இருந்து படங்களை கணினிக்கு பிரதி எடுக்கவும்/ மாற்றவும்.

பிகாஸா போன்ற மென்பொருளால் இவை சரியாக வந்து இருக்கின்றனவா என்று சோதிக்கவும்.

ஒவ்வொரு ஓலையையும் இரண்டிரண்டாக எடுத்தோம் இல்லையா? ஆகவே போலிகளை நீக்கவும். ஒரு ஓலையை எடுத்த படங்கள் இரண்டில் நன்றாக வந்த ஒன்றை வைத்துக்கொண்டு மற்றதை நீக்கவும் .

முதல் படத்தை கிம்ப் இல் திறந்து கொள்ளுங்கள்.

From olai

நன்கு தெரியும் படி ஜும் செய்து கொள்ளலாம்.

தேர்வு கருவியை தேர்ந்தெடுத்து கொள்ளவும். படத்தில் உள்ள எட்டு ஓலை சுவடிகளில் முதல் சுவடியை மட்டும் இப்போது பிரிக்கப்போகிறோம். முதல் ஓலையின் இடது மேல் பகுதியில் சொடுக்கியை முதலில் வைத்து வலது சொடுக்கி பொத்தானை அழுத்தியபடியே கீழ் வலது முனைக்கு வரவும். இப்போது சொடுக்கி பொத்தானை விட்டுவிடலாம். ஓலை சரியாக தேர்வு ஆகியிருக்கிறதா என்று சரி பார்க்கவும். தேவையானால் மேல் கீழ் பக்கவாட்டு விளிம்புகளை இழுத்து விடலாம், குறுக்கலாம். இதற்கு செய்ய வேண்டியதெல்லாம் நகர்த்த வேண்டிய விளிம்பின் அருகில் சொடுக்கியை கொண்டு செல்வதுதான். ஒரு பெட்டி பொல தேர்வுக்குள் தோன்றினால் அதை இழுக்கத்தயார் என பொருள். சொடுக்கியை இடது பொத்தானை அழுத்தியபடி தேவையான திசையில் நகர்த்தி சரியான தேர்வு கிடைத்தவுடன் சொடுக்கி பொத்தானை விட்டு விடவும்.

From olai

அடுத்து சில விசைப்பலகை குறுக்கு விசைகளால் மிக வேகமாக நம் வேலையை முடிக்கலாம். கீழ் கண்ட வரிசையில் செய்க:

கண்ட்ரோல் + c =தேர்ந்தெடுத்த இடம் பிரதி எடுக்கபப்டும்.

கண்ட்ரோல் + ஷிப்ட் + v = பிரதி எடுத்தது புதிய படமாக காட்டப்படும்.

கண்ட்ரோல் + s = சேமிக்க கட்டளை.

From olai

இப்போது எங்கே சேமிக்க என்று கேட்கும். இதற்கு B அடைவை சுட்டவும்.

அது திறந்தபின் கோப்பின் பெயராக 0001.jpg என உள்ளிடுக. என்டர் விசையை தட்டவும்.

From olai

அடுத்து கிம்ப் படத்தை ஏற்றுமதி செய்ய அனுமதி கேட்கும். அது என்ன என்று புரியாவிட்டாலும் மீண்டும் என்டர் விசையை தட்டவும்.

From olai

அடுத்து என்ன க்வாலிடியில் சேமிக்க என்று கேட்கும். இதற்கு நாம் சில சோதனைகள் செய்தே சரியான மதிப்பை உள்ளிட்ட முடியும். படம் நன்கு பெரியதாக இருந்தால், அதிக தெளிதிரனில் எடுத்து இருந்தால் 85% என்பதை அப்படியே ஒப்புக்கொள்ளலாம். இல்லை 100% என அமைக்கலாம். சரியான மதிப்பு கண்டுபிடித்துவிட்டால் அதை முன்னிருப்பாக ஆக்கிவிடலாம்.

From olai

மதிப்பை நாம் ஒத்துக்கொண்டு என்டர் விசையை தட்டினால் படம் சேமிக்கப்படும். புதிய படம் சேமிக்கப்பட்டு பெயருடன் காட்டப்படும். இதை மூட ஆல்ட் + எஃப் 4 விசைகளை அழுத்தவும்.

From olai

இப்போது நாம் திறந்த அசல் படம் மேலே தேர்வுடன் காணலாம். இந்த தேர்வையே கீழே நகர்த்தலாம். தேர்வின் மத்தியில் சொடுக்கிப்பிடிக்க எல்லாப்பக்கமும் அம்புக்குறி போல ஒரு சின்னம் பார்க்கலாம். சொடுக்கியை விடாமல் தேர்வை அப்படியே கீழே சரியான இடத்துக்கு - இரண்டாம் ஓலையை சுற்றி நகர்த்தவும். தேவையான படி விளிம்புகளை நகர்த்தவும்.

From olai

பின் மீண்டும்

கண்ட்ரோல் + c , கண்ட்ரோல் + ஷிப்ட் + v , கண்ட்ரோல் + s .

எங்கே சேமிக்க என்று கேட்கும். அனேகமாக இப்போது B அடைவை திறந்திருக்கும். அதை அப்படியே ஒப்புக்கொள்ளலாம். கோப்பின் பெயராக 0003.jpg என உள்ளிடுக. என்டர் விசையை தட்டவும்.

கோப்பு எண்ணை பாருங்கள். எல்லா ஓலைகளின் முன் பக்கத்தை மட்டுமே இப்போது பிரித்தெடுக்கிறோம் இல்லையா? இவற்றின் பின் பக்கம் இன்னும் வர வேண்டி இருக்கிறது. அதனால்தான் இப்போது ஒற்றைப்படை எண்ணாக மட்டுமே பெயரிடுகிறோம். முதல் ஓலையின் பின் பக்கம் இரண்டு என பெயரிடப்படும். இரண்டாம் ஓலையின் முன்பக்கம் கோப்பு மூன்று. அதன் பின் பக்கம் நான்கு. சரிதானே?

மீண்டும் இரு முறை என்டர் விசையை தட்டி சேமித்தபின் ஆல்ட் + எஃப் 4 விசைகளை அழுத்தி படத்தை மூடவும்.

பின் மூன்றாம் ஓலை. இதே போல எட்டும் முடிந்தபின் அசல் படத்தை மூடுங்கள். மாற்றங்களை சேமிக்கவா என்று கேட்கும். வேண்டாம் என்று சொல்லுங்கள்.

From olai

மூடிவிட்டு எட்டு ஓலைகளின் பிம்பம் உள்ள அடுத்த படத்தை திறந்து கொள்ளவும். இப்படி திறக்க படத்தை சும்மா இழுத்து கிம்ப் சாளரத்தில் விடலாம்.

From olai

முன் செய்தவாறே இப்போதும் செய்ய வேண்டும். படங்கள் சேமிக்கும்போது அவற்றுக்கு பெயர் 0002.jpg, 0004.jpg என இரட்டைப்படையாக வரிசையாக கொடுக்கவும். இப்படி இந்த ஒலையின் பிம்பங்கள் எல்லாம் பிரதி எடுத்து சேமித்தபின் அடைவில் 0001.jpg, முதல் 0016.jpg, வரை பதினாறு படங்கள் இருக்கும். சரிதானே?

இப்போது பி அடைவை திறந்து இந்த படங்கள் அனைத்தையும் ஒன்றாக வெட்டி அடைவு ஏ வில் ஒட்டவும்.(கண்ட்ரோல் + A ; கண்ட்ரோல் + X; கண்ட்ரோல் + V)

இது எதற்கு?

படத்தை சேமிக்கும்போது அந்த அடைவில் உள்ள படங்களின் பட்டியலை பார்க்கலாம். சுமார் இருபது கோப்புகளின் பெயர்கள் தென்படும். அதற்குமேல் ஸ்க்ரால் செய்துதான் பார்க்கவேண்டும்.

படங்களுக்கு பெயரிடும்போது கவனம் தேவை. தவறாக பெயரிடுவது எளிதில் நிகழும். அப்படி நிகழாமல் இருக்க சேமிக்கும்போது இந்த பட்டியலை பார்த்து உறுதி செய்து கொண்டு பெயரிடலாம்.

அடுத்த படத்தை கையாளும்போது 0017.jpg என்று ஆரம்பித்து பெயரிட்டுக்கொண்டு போக வேண்டும்.

எல்லாவற்றையும் இப்படி வெட்டிய பிறகு அப்படியே வண்ண பிம்பங்களாகவே வைத்துக்கொள்ளலாம்.

From olai

இல்லை இன்னும் கோப்பு அளவை குறைக்க நினைத்தால் பிக்காசாவில் இவற்றை திறந்து பாட்ச் ப்ராசஸ் மூலம் கருப்பு வெள்ளை ஆக்கலாம்.

From olai

தேவையானால் இர்பான் வியூவில் திறந்து ஷார்பன் செய்து கொள்ளலாம்.

From olai

இன்னும் மேம்படுத்த முடிந்தாலும் செய்யலாம்.

எல்லா படங்களையும் இங்கே பார்க்கலாம்!

Saturday, May 28, 2011

ஓலைச்சுவடி - மின்னாக்கம்

இது கொஞ்சம் விசேஷமான பதிவு.

ஓலை சுவடிகளை மின்னாக்கம் செய்ய இது வழிமுறை.

தேவையானவை:

1. ஓலைச்சுவடிகள்.

2. காமிரா. ஜூம், மெமரி கார்ட் உடன்.

3. குதிரை ஸ்டூல்.

4. உதவியாளர்கள்

5. நல்ல இயற்கையாக வெளிச்சமான இடம்.

6. சுவடிகளை கீழே வைக்க ஒரு வெள்ளை சார்ட் தாள்.

7. நிட்டிங் நீடில்

ரெடியாயிட்டீங்களா?

கீழே வெள்ளை சார்ட் தளை வையுங்க.

குதிரை ஸ்டூலை அது பக்கத்திலே வையுங்க.

ஓலை சுவடியை ஜாக்கிரதையாக பிரிக்கவும்.மேலிருந்து கீழே வரிசையாக ஒவ்வொன்றாக எட்டு சுவடிகளை வைக்கவும். காமிராவில் செட்டிங் அமைக்கவும். எவ்வளவு தெளிதிறன் முடியுமோ அதை பொறுத்து அதிக தெளிதிறன் அமைக்கவும். படத்தின் அளவையும் அதிகமாக அமைக்கவும். என் கானன் எஸெக்ஸ் 100 இல் சூப்பர் ஃபைன், ஃபைன், நார்மல் என இருக்கிறது.அதில் ஃபைன் போதுமானது. படத்தின் அளவு லார்ஜ் என அமைத்தேன். அவரவர் காமிராவை பொருத்து இது மாறும் என்பதால் சோதனை செய்து சரியான அளவை காண்க.

குதிரை ஸ்டூல் மீது கைகளை தாங்கிக்கொண்டு காமிராவை கீழ் நோக்கி பார்த்து ஜூம் செய்து சுடவும். சந்தேகமானால் இரண்டாம் முறை சுடலாம். பின்னால் இரண்டில் எது நன்றாக இருக்குன்னு பார்த்துக்கொண்டு வேண்டாததை நீக்கிவிடலாம்.

ஒரு போட்டோவில் எட்டு சுவடிகளின் ஒரு பக்கம் பதிவாகும்.

அடுத்து எல்லா ஓலைகளையும் பக்கம் திருப்பி இன்னொரு (அல்லது 2) படம் எடுக்கவும்.

படம் எடுத்த பின் ஓலைகளை வரிசை மாறாமல் அப்படியே முதல் சுவடி உள்ளே போகும் படி நிட்டிங் நீடில் இல் சொருகவும். அடுத்த எட்டு சுவடிகளை எடுத்து வரிசையாக அடுக்கவும். பின் முன்னே சொன்னபடி....

எல்லா சுவடிகளையும் படம் எடுத்தபின் ஓலைச்சுவடிகளை பழையபடி கட்டி வைக்க வேண்டும். நிட்டிங் நீடில் இல் அவை வரிசையாக இருக்கும். கயிறை நுழைத்து கவனமாக கட்டுங்கள்.

பெரியதாக மலைக்க வைக்கும் அளவு சுவடிகளைக்கூட எளிதில் விரைவில் படம் எடுத்துவிடலாம்.

படம் எடுத்தபின் போஸ்ட் ப்ராஸஸிங்.... அடுத்த பதிவில்...

விளக்கப்படங்கள் கீழே காண்க.

From minnaakkam

Thursday, May 26, 2011

கல்லணை...

மே மாசம் இது வரை ஒரு போஸ்டும் இல்லாம போயிடுச்சு!

போகட்டும். இப்ப போட்டுடலாம்.

ஓலை சுவடிகளை தேடி திருச்சி வரை போய் வந்தேன். அங்கே பக்கத்திலே கல்லணைகிட்டே ஒரு ஜைமினி ஸாம வேத பண்டிதர் இருக்கார்; அவர்கிட்டே 150 வருடங்களாவது ஆன ஓலைகள் இருக்காம் என்று கேள்விப்பட்டு அவற்றை பாதுக்காக்க போட்டோ எடுக்கலாமான்னு கேட்டு அவரும் சரின்னு சொன்னாரா.... ஹிஹி சரி சரி.. மின்னாக்க பணிக்காக கல்லணை போனோம். காவேரிக்கு வடக்கு கரை ஓரமாகவே போனோம். கரிகாலன் கட்டி வைத்தான் கல்லணைன்னு பாட்டு பாடிகிட்டே போய் பாத்தா ஒரு கல்லும் காணலை. எல்லாம் வெள்ளக்காரன் வந்து அதே இடத்திலே கட்டிட்டான் போல் இருக்கு.

From kallanai

1931 ல முடிச்சு இருக்காங்க.

கல்லணை மத்த இடங்கள் மாதிரி ஒரே ஒரு நீட்டமான அணையா இல்லை. மூணு பகுதியா ப வடிவத்தில இருக்கு. நாங்க வந்த வடக்குப்பக்கம் ஒன்னும் ஆர்பாட்டம் இல்லாம அமைதியா இருக்கு.

From kallanai

தெற்கு பக்கம்தான் பஸ் ஸ்டாண்ட் இருக்கு. அங்கே கொஞ்சம் கச முசன்னு கூட்டம். எல்லாரும் ச்சும்மா இப்படீஈஈஈ கொஞ்சம் நடந்து போயிட்டு வராங்க. சுற்றுலாவுக்கு கொஞ்சம் டிஸபாய்ண்ட்மென்ட் தான்.